السلام عليكم جميعا، بداية متنساش تصلي على رسول الله

النهارة هشرح ازاي تعدل على حقول صفحة التشيك اوت الخاصة بالووكوميرس ولكن قبل ما ابدأ لازم تكون عارف حاجة مهمة ياصديقي.. أن مؤخرا قامت ووكوميرس بتحويل بعض صفحاتها إلى فريم وورك React ولو مش عارف الريأكت فهي التقنية أو فريم وورك اللي مبني بيه فيس بوك حاجة كدة محترمة جدا معتمدة على الجافاسكريبت ومن أهم مميزاتها أنها سريعة جدا جدا يعني تقريبا الصفحة مش بتحمل خالص وده بسبب انها بتعتمد على حاجة اسمها الcomponents، لو عايز تقرأ اكتر عن الريأكت اضغط هنا.

طيب نرجع لموضوعنا تاني، هتستفيد ايه انك تعرف ان ووكوميرس حولت بعض صفحاتها انها تكون شغالة بالريأكت؟ ببساطة ياصديقي زمان لما كانت صفحات الووكوميرس صفحاتها مكتوبة بالphp عادي كنت بسهولة جدا تقدر تعدل عليها وتضيف فيها براحتك وكان فيه بلاجينز كتير جدا بتقدر من خلالها تعدل على صفحات الووكوميرس بما فيهم صفحة التشيك اوت وعلى سبيل المثال بلاجين اسمها Checkout Field Editor اللي كنت من خلالها تقدر تعدل على اي حقل من حقول التشيك اوت بكل سهولة.

طيب دلوقتي ياباشمهندس اعمل ايه يعني؟
بص ياسيدي ببساطة ووكوميرس لما حولت صفحاتها إلى الريأكت هي ملغتش النظام القديم اللي كان بالphp عادي، يعني ببساطة سابتلك الحرية انك تشتغل بالنظام الجديد او ترجع للقديم.

كلام جميل
يعني دلوقتي علشان تعدل على صفحة التشيك اوت أو اي صفحة تانية تخص ووكوميرس لازم ترجعها تاني للphp علشان تقدر تعدل عليها يا إما بالكود أو بأي بلاجين من اللي بتعدل على الصفحات دي.. ببساطة ووكوميرس معتمدة على محرر Gutenberg علشان تعمل النظام الجديد ده في صفحاتها، يعني انت علشان تعدل على صفحة وتحولها من النظام الجديد إلى النظام القديم بتدخل على الصفحات وتختار الصفحة اللي عايز تعدلها على سبيل المثال صفحة سلة المشتريات أو صفحة إتمام الطلب هتعملها Edit page هتلاقي الصفحة مبنية بالبلوكات بتاعة gutenberg هتمسح كل البلوكات دي وتبدلهم بالشورت كود الخاص بالصفحة يعني لو هتغير صفحة اتمام الطلب هتستخدم بلوك اسمه shortcode وهتضيف فيه الكود ده [woocommerce_checkout]

ودول صورتين توضيحيتين لصفحة checkout بالبلوكات الجديدة وبعد تغييرها للشورت كود علشان تبقى بالنظام القديم

بس كده ياهندسة؟ اه بس كده يا صديقي.. الموضوع بسيط جدا وهتكرره على اي صفحة عايز تعدلها من النظام الجديد اللي معتمد على الريأكت إلى النظام القديم اللي معتمد على php، ولو محتاج تعرف باقي الشورت كودز الخاص بباقي صفحات الووكوميرس من اللينك ده

طبعا مش محتاج أقولك انك خلاص بمجرد ما ترجع الصفحة للنظام القديم تقدر تستخدم البلاجين اللي ذكرتها فوق لتعديل حقول التشيك اوت أو انك تعدل عليها بكود php خاص للتحكم في إظهار أو اخفاء الحقول.. علشان تستخدم الكود التالي لتعديل على حقول التشيك اوت لازم يكون عندك Child Theme وتضع الكود في ملف Functions.php أو إنك تستخدم أي بلاجين من اللي بتسمح لك وضع أكواد الphp في موقعك على سبيل المثال بلاجين اسمها WPCode هتصطبها وتضيف كود ال php التالي بداخلها:

<?php

function layers_remove_woo_checkout_fields($fields)
{

// remove billing fields
unset($fields['billing']['billing_first_name']);
unset($fields['billing']['billing_last_name']);
unset($fields['billing']['billing_company']);
unset($fields['billing']['billing_address_1']);
unset($fields['billing']['billing_address_2']);
unset($fields['billing']['billing_city']);
unset($fields['billing']['billing_postcode']);
unset($fields['billing']['billing_country']);
unset($fields['billing']['billing_state']);
unset($fields['billing']['billing_phone']);
unset($fields['billing']['billing_email']);

// remove shipping fields 
unset($fields['shipping']['shipping_first_name']);
unset($fields['shipping']['shipping_last_name']);
unset($fields['shipping']['shipping_company']);
unset($fields['shipping']['shipping_address_1']);
unset($fields['shipping']['shipping_address_2']);
unset($fields['shipping']['shipping_city']);
unset($fields['shipping']['shipping_postcode']);
unset($fields['shipping']['shipping_country']);
unset($fields['shipping']['shipping_state']);

// remove order comment fields
unset($fields['order']['order_comments']);

return $fields;
}
add_filter('woocommerce_checkout_fields', 'layers_remove_woo_checkout_fields');

سؤال هيجي في بال أي حد، طيب يا هندسة ماذا لو عايز اعدل على حقول التشيك اوت بس على النظام الجديد اللي شغال بالريأكت؟ ببساطة ياصديقي لازم تكون بتعرف تشتغل ريأكت كويس علشان تقدر تعدل عليه، ولازم تذاكر النظام الجديد بتاعهم وتقرأ عنه كويس علشان تعرف تعدل عليه، اقرأ عنه من اللينك ده

وكده خلصت موضوع النهاردة يارب يفيدكم ويجعله الله في ميزان حسناتنا